පොසොන් සඳ

මිස්සක පව්වෙන් නැග එන දම් හඬ
ඇසේ ඇසේ මගෙ සවන පුරා
හිස් අවකාසේ පුරා රැව් දිදී දිදී
ඇසේ ඇසේ මිහි මඬල පුරා

වසන් කරන් සිත් සතන් කෙලෙස් මල්
නසන්න හොඳ කල් එළඹෙන්නේ
පසන් කරන් සිත් සතන් බොදු බැතින්
පොසොන් සඳයි අර නැග එන්නේ

නිවන් වලාවයි මහා මේරුවේ
ගැටී ගැටී අර නැග එන්නේ
ගිමන් නිවාලන දම් වරුෂාවයි
ලක් දෙරණේ අද විසිරෙන්නේ

මිහින්තලාවයි මහමේව්නාවයි
අම්බස්තලයයි සුදිලෙන්නේ
ගුවන්තලාවේ මහින්ද මහ සඳ
කරුණා දිය බිඳු වස්සන්නේ

සොලොස් කලාවයි සම්බුදු මහිමයි
විශ්කම් දෑතින් නිමවෙන්නේ
ගමයි පන්සලයි වැවයි දාගැබයි
බොදු දන හදවත් සනසන්නේ