ඔබත් තනිකඩයි තවමත් මමත් තනිකඩයි

බුලත් හෙප්පුවක් අරගෙන
සුරත් වෙව්ලමින් සිව්නෙත්
යාවුන දවසේ
විදුලි සැර වැදී සියොලඟ
දැවී අළුවුනානම් අද
අපි එක පියසේ
මගේ හිත අරන් හොරෙන්ම
මට හිත ගන්නට බැරිවිය
සිතූ ලෙසේ
ඔබේ කඳුළු නෙත් රිදුන‍ට
මටත් දුක දැනේ බොලඳියේ
අද දවසේ
පොරොන්දම් නිසා පොරොන්දු
කඩ උනා කියා නෑසිය
මඟ හැරියේ
ඔබත් තනිකඩයි තවමත්
මමත් තනිකඩයි
මොනවා කරන්නද සොඳුරියේ
අපෙ දෛවේ

මල් කෙල්ලන් මල්

මල් පොකුරු පිටින් විකිණුවේ අපි
නැති බැරිකම හින්දා
මල් අපෙන් ගන්න මහත්වරුනි
දුරින් ආපු හින්දා

මල් කෙල්ලන් මල් අරගෙන
ලඟට ආව හින්දා
හිත් මල පොඩි කරන්නෙපා
මමත් මලක් හින්දා

වැව් තාවුල්ලේ මල් නෙලලා
මඩ තැවුරුණු හින්දා
මිළ කලේ මල් මිටක් ගානේ
දුක් ගින්දර හින්දා

ඔබ දුන් රුපියලක් ගානේ
කුස ගිනි නව් හින්දා
තුන්හිතකින්වත් දොස් කියන්න
එපා මෙන්න වැන්දා